Árangur

Til að fá upplýsingar um stöðu einstaklinga sem útskrifaðir hafa verið frá Hringsjá undanfarin ár var leitað samstarfs við kennara í diplómanámi í starfsendurhæfingu um gerð könnunar. Nemendur í diplómanámi í starfsendurhæfingu gerðu könnun á náms- og starfsendurhæfingu hjá Hringsjá á árunum 2012-2019. Verkefnið var unnið í áfanganum Nýsköpun á vettvangi: Fræði og fag við Háskóla Íslands undir leiðsögn dr. Ástu Snorradóttur, lektors við félagsráðgjafadeild H.Í.

Á árunum 2012-2019 útskrifuðust 256 manns eftir 3ja anna nám frá Hringsjá, 174 konur og 82 karlar. Alls svöruðu 76 einstaklingar könnuninni, 54 konur og 22 karlar. Ekki var marktækur munur á svarhlutfalli kynjanna. Miðað við fyrri kannanir hefur þátttakendum í yngsta aldurshópnum 18-24 ára fjölgað úr 4% í 28%. Einnig fjölgaði þeim sem eingöngu voru með grunnskólapróf úr 37% í um 48%. Alls eru 59% í fullri vinnu eða hlutastarfi á móti 33% í fyrri könnunum. Flestir, eða 76% svarenda, höfðu stundað nám af einhverju tagi, allt frá námskeiðum til háskólanáms eftir að starfsendurhæfingu lauk. Alls eru 27%  í námi núna. Þannig að hlutfall svarenda sem eru í námi eða starfi að hluta til eða að fullu er 86%.

Helstu niðurstöður eru að meðalaldur þátttakenda er lægri en áður, fleiri eru eingöngu með grunnskólapróf við upphaf starfsendurhæfingar, fleiri skila sér út á vinnumarkað og þátttakendur eru duglegir að bæta við sig þekkingu í formi náms eða námskeiða að lokinni starfsendurhæfingu hjá Hringsjá.

Þessi könnun sýnir að náms- og starfsendurhæfing Hringsjár skilar árangri fyrir þátttakendur bæði hvað varðar betri líðan og atvinnuþátttöku. Við gerð þessa verkefnis kom í ljós að samspil umhverfis, starfsfólks og úrræða Hringsjár skilar sér í góðum árangri flestra þátttakenda og í sumum tilfellum taka sumir alveg nýja stefnu í lífinu.