Útskrift á vorönn 2012

Útskriftin fór fram miðvikudaginn 16. maí í frábæru veðri (að venju). Mikið fjölmenni nemenda, aðstandenda og gesta var viðstatt og eiginlega meira en húsrúm leyfði. Helga Eysteinsdóttir, starfandi forstöðumaður stýrði athöfninni, en Guðmundur Magnússon, formaður Öryrkjabandalagsins hélt hátíðaræðuna. Svavar Knútur skemmti gestum með sinni ljúfu tónlist, en sýndi þó á sér aðra skuggalegri hlið í lagi um zombía!

Jafnframt útskrift fór fram einkunnafhending 1. og 2. annar. Fyrir hönd nemenda töluðu Vilhjálmur Karl Haraldsson fyrir hönd 1. annar og Rafn Ölduson fyrir hönd 2. annar. Kveðjuræðu fyrir hönd útskriftarnema hélt Jón Helgi Gíslason. Mörg góð orð féllu í garð Hringsjár og eru þau þökkuð hér með. Að lokinni athöfn voru boðnar veitingar.

Að þessu sinni útskrifuðust 18 einstaklingar eftir 3ja anna nám og endurhæfingu í Hringsjá. Útskriftargjöfin voru handunnar fuglsmyndir á íslensku fjörugrjóti eftir Laufeyju Jensdóttur myndlistarkonu.

Hér má sjá svipmyndir frá hátíðinni (fleiri myndir eiga eftir að koma) svo og skjal með myndum af útskriftargjöfunum.

Kveðja frá nemanda

Þessi fallega kveðja frá nemanda birtist á borði kaffistofunnar (ásamt skál af páskanammi). Starfið með nemendum Hringsjár er okkur öllum mjög gefandi, en svona góð orð gleðja okkur auðvitað sérstaklega og eru hvatning til að gera enn betur.

Nú hef ég sjálfstraust og gleði í hjarta.
Hringsjá gaf mér aftur mitt líf.
Yfir engu ég hef hér að kvarta.
Þið eruð ljós mitt, skjöldur og hlíf.


Gleðilega páska
Takk fyrir að vera til elskurnar mínar.

Næstu námskeið

Kynntu þér námskeiðin hjá Hringsjá. Námskeiðin miða öll að því að efla þátttakendur sem einstaklinga og gera þá hæfari til að takast á við dagleg viðfangsefni og uppgötva eigin styrkleika. Þeir sem eru að hugsa um að koma í 3ja anna prógrammið ættu að koma fyrst á námskeið, bæði til að kynnast Hringsjá en fyrst og fremst til að verða betur færir um að takast á við prógrammið.

Dagskrá og lýsingar námskeiða má finna á námskeiðasíðunni.

Greiðsluupplýsingar:

Fyrir þá sem vilja greiða efnisgjöld eða námskeiðsgjöld í gegnum netbanka eru hér nauðsynlegar upplýsingar:

Kennitala Hringsjár: 540987-2549

Reikningsnúmer: 0111-26-036935

Ath. Muna að setja nafn eða kennitölu nemanda sem skýringu svo hægt sé að rekja færsluna!

Þakkir til SORPU

Sorpa hefur veitt Hringsjá styrk að upphæð tvær miljónir króna. Helga Eysteinsdóttir forstöðumaður veitti styrknum móttöku við athöfn sem fram fór í Góða Hirðinum föstudaginn 16. desember.

Þetta er í þriðja sinn sem Hringsjá hlýtur rausnarlegan styrk frá SORPU. Þessir styrkir hafa komið sér einkar vel og þökkum við þá af alhug.

Útskrift á haustönn

Útskriftarhátíð Hringsjár á haustönn 2011 fór fram í húsnæði Hringsjár að Hátúni 10d þann 15. desember s.l.

Að þessu sinni útskrifuðust 15 nemendur eftir 3ja anna nám og endurhæfingu við Hringsjá. Aðrir nemendur fengu afhentar einkunnir. Hátíðin fór vel fram að vanda. Gunnar Þórðarson mætti með gítarinn og söng nokkur lög þar á meðal Vetrarsól en það var einmitt þema hátíðarinnar að þessu sinni.

Guðbjartur Hannesson, velferðarráðherra, hafði boðað komu sína til að flytja hátíðarávarpið en forfallaðist vegna þingstarfa. Hátíðarávarpið var því flutt af fulltrúa ráðherra, Guðrúnu Sigurjónsdóttur. Hrósaði hún því starfi sem hefur nú farið fram í Hringsjá í 25 ár og óskaði nemendum til hamingju með árangur sinn.

Ávörp fyrir hönd nemenda fluttu Rafn Ölduson fyrir hönd 1. annar og Jóhanna S.B. Ólafsdóttir fyrir hönd 2. annar og stóðu sig bæði með prýði. Ræðu fyrir hönd útskriftarnema flutti Fanney Viktoría Kristjánsdóttir og er sú ræða með þeim betri sem við höfum heyrt. Með leyfi Fanneyjar höfum við sett upptöku af ræðunni hér á síðuna.

Skreytingar og umsjón veitinga var í höndum fjögurra kjarnorkukvenna sem áður prýddu sali Hringsjár, þeirra Berglindar Svövu Grétarsdóttur, Helgu Sigurðardóttur, Júlíu Margrétar Sveinsdóttur og Línu Þyríar Jóhannesdóttur. Þær eiga mikinn heiður og þakkir skildar fyrir framlag sitt.

Hringsjá óskar öllum nemendum sínum til hamingju með árangur sinn á önninni. Sjáumst endurnærð á nýja árinu!

Hringsjá tilnefnd til verðlauna

Hvatningarverðlaun Öryrkjabandalags Íslands eru veitt árlega á alþjóðadegi fatlaðra þann 3. desember. Veitt eru þrenn verðlaun í flokkunum einstaklingur, fyrirtæki/stofnun og umfjöllun/kynning.

Að þessu sinni hlaut Hringsjá tilnefningu í flokknum fyrirtæki/stofnun og erum við meiriháttar montin af þeirri viðurkenningu þó að við höfum ekki fengið sjálf verðlaunin.

Verðlaunaafhendingin fór síðan fram í Salnum í Kópavogi þann 3. desember s.l. og afhenti forseti Íslands verðlaunin, en embættið er verndari þeirra. Að þessu sinni hlutu verðlaunin:

• Í flokknum Fyrirtæki/stofnun: Hestamannafélagið Hörður, fyrir frumkvöðlastarf í hestaíþróttum fatlaðra barna og unglinga
• Í flokknum Einstaklingar: Bergþór Grétar Böðvarsson (fyrrverandi nemandi í Hringsjá), fyrir að stuðla að jákvæðri og uppbyggilegri umræðu um geðsjúkdóma á Íslandi
• Í flokknum Umfjöllun/kynning: Umsjónarfólk sjónvarpsþáttarins „Með okkar augum“, fyrir frumkvöðlastarf í íslenskri dagskrárgerð

Hringsjá óskar verðlaunahöfunum til hamingju með þessa viðurkenningu.

Námskeið á vorönn 2012

Dagskrá námskeiða á vorönn er nú komin á vefinn.

Sjá dagsetningar og nánari lýsingar á námskeiðssíðunni

Samstarf Hringsjár og ABC barnahjálpar

Núna í haust byrjaði samstarf milli Hringsjár og ABC barnahjálpar. ABC rekur nytjamarkað í Súðavogi þar sem bækur, fatnaður og húsgögn eru til sölu. Hluti af því sem gefið er í nytjamarkaðinn er ekki hægt að selja en má endurnýta á annan hátt. Samstarf Hringsjár og ABC felst í því að nýta það efni og er það notað til myndsköpunar í myndlistartímum.

Jöfnunarstyrkur

Sækir þú nám fjarri lögheimili og fjölskyldu?

Kynntu þér reglur um námsstyrki og leiðbeiningar um skráningu á www.lin.is

Hægt er að skrá umsókn á Innu eða netbankanum! Umsóknarfrestur vegna skólaársins 2011-2012 er til 15. október næstkomandi!

Lánasjóður íslenskra námsmanna
Námsstyrkjanefnd

Ánægjulegt samstarf um VIRKNI-verkefni

Hringsjá og Velferðarsvið Reykjavíkurborgar hafa gert með sér samning um virkniverkefni fyrir notendur fjárhagsaðstoðar. Samningurinn er byggður á lögum um félagsþjónustu sveitarfélaga og er liður í átaki borgarinnar við að virkja einstaklinga sem njóta fjárhagsaðstoðar og eiga ekki rétt á atvinnuleysisbótum hjá Vinnumálastofnun.

Samningurinn gengur út á að þátttakendur fara á hin ýmsu námskeið hjá Hringsjá sér að kostnaðarlausu og hljóta jafnframt náms- og starfsráðgjöf hjá Hringsjá ásamt félagsráðgjöf hjá sinni þjónustumiðstöð. Nú þegar hafa 15 þátttakendur tekið þátt í 21 námskeiði. Verkefnið hefur farið vel af stað og fyrirhugað er að það haldi áfram á vorönn 2011 og að a.m.k. 20 einstaklingar hafi þá möguleika á námskeiðsþátttöku hjá Hringsjá.